ປະຫວັດຄວາມເປັນມາ ຂອງ ບໍລິສັດ ຜະລິດ-ໄຟຟ້າລາວ ມະຫາຊົນ     There have been 10411 visitors to this websiteThere have been 10411 visitors to this websiteThere have been 10411 visitors to this websiteThere have been 10411 visitors to this websiteThere have been 10411 visitors to this website 

ເລີ້ມ ​ແຕ່​ປີ 2008 ເປັນຕົ້ນ​ມາ ລັດ​ວິ​ສາ​ຫະກິດ​ໄຟຟ້າ​ລາວ​ (ຟຟລ) ໄດ້ ປະຕິບັດ​ຕາມ​ທິດ​ຊີ້ນຳ ຂອງ​ ລັດຖະບານ ສ ປ ປ ລາວ ວ່າດ້ວຍ​ການ​ປັບປຸງ​ໂຄງ​ສ້າງທຸລະ​ກິດ ຂອງ ຂະ​ແຫນງ​ການອຸດ​ສາ​ຫະກຳໄຟຟ້າ ​ໃນ ສ ປ ປ ລາວ , ລັດ​ວິ​ສາ​ຫະກິດ​ໄຟຟ້າ​ລາວ ​ຊື່​ງ ​ເປັນ​ບໍລິສັດ ຂອງ​ລັດ ​ມີຫນ້າ​ທີ່ດຳ​ເນີນ​ທຸລະ​ກິດ ​ໃນການ​ຜະລິດ, ຂົນ​ສົ່ງ ​ແລະ ຈຳຫນ່າຍ ພະລັງງານໄຟຟ້າ ຈຶ່ງໄດ້​ວ່າ​ຈ້າງ ບໍລິສັດ​ທີ່​ປຶກສາ​ທາງ​ການ​ເງິນ KTZMICO ສຶກສາຄວາມ​ເປັນ​ໄປ​ໄດ້ ໃນການປັບ​ໂຄງ​ສ້າງ​ທຸລະ​ກິດ ຂອງ ​ຟຟລ ​​ແນ​ໃສ່ເຮັດ​ໃຫ້​ຂະ​ແຫນງ​ການ​ພະລັງງານ​ໃນ ສ ປ ປ ລາວ ມີ​ຄວາມ​ເຕີບ​ໃຫຍ່​ຂະຫຍາຍຕົວ ຕອບ​ສະຫນອງ​ໄດ້​ຄວາມ​ຮຽກຮ້ອງຕ້ອງການຂອງສັງຄົມ ທີ່ນັບມື້ນັບ ສູງຂຶ້ນ.

ມາ​ເ​ຖິງ ປີ 2010 , ຜົນ​ການ​ສຶກສາ​ໄດ້ ຢັ້ງຢືນ​ຄວາມ​ເປັນ​ໄປ​ໄດ້ ທີ່​ຈະ​ຫັນເອົາພາກສ່ວນ​ຜະລິດ ຂອງ ​ໄຟຟ້າລາວ ມາ​​ເປັນ​ທຶນຮອນ ເພື່ອ​ສ້າງຕັ້ງ​ເປັນ ບໍລິສັດ ຜະລິດ-​ໄຟຟ້າ​ລາວ ​ມະຫາ ຊົນ ແນ​ໃສ່ ເພື່ອລະດົມ​ທຶນ​ເພີ້ມດ້ວຍ​ການ​ຂາຍ​ຮຸ້ນ ຈຳນວນ​ 25 % ຂອງ​ບໍລິສັດອອກ ແລະ ນຳ​ເອົາ​ຮຸ້ນ ຂອງ​ບໍລິສັດດັ່ງກ່າວ ​ເຂົ້າ​ຈົດ​ທະບຽນ​ໃນ​ຕະຫລາດ​ຫລັກ​ຊັບ ຂອງ ລາວ .
ພາຍ​ໃຕ້​ການ ຊີ້ນຳ ຂອງ ຄະນະ​ກຳມະການ ຄຸ້ມ​ຄອງ​ຫລັກ​ຊັບ ​ແລະ ຕະຫລາດ ຫລັກ​ຊັບ ​ຄະນະ​ກຳມະການ ວິຊາ​ການ ເພື່ອ​ກະກຽມ ​ເອົາ​ລັດ​ວິ​ສາ​ຫະກິດ​ໄຟຟ້າ​ລາວ ​ເຂົ້າຈົດ​ທະບຽນ​ໃນ​ຕະຫລາດ ຫລັກ​ຊັບກໍ​ໄດ້ ຮັບ​ການ​ສ້າງຕັ້ງຂື້ນ ຊຶ່​ງປະກອບ​ດ້ວຍ​ບັນດາ​ກຳມະການ​ໃນຫລາຍ​ຂະ​ແຫນງ​ການ​ ທີ່​ກ່ຽວ​ຂ້ອງ ຂອງ​ກະຊວງ​ຕ່າງໆ ​​​ເຂົ້າ​ຮ່ວມ. ຢູ່ພາຍ​ໃນ​ລັດ​ວິ​ສາ​ຫະກິດ​ໄຟຟ້າ​ລາວ​ເອງ ກໍ​ໄດ້ມີ​ການສ້າງຕັ້ງຫ້ອງການຫັນ ເອົາຝ່າຍຜະລິດ ຂອງ ​ລັດ​ວິ​ສາ​ຫະກິດໄຟຟ້າ​ລາວ ເພື່ອ​ແຍກ​ອອກ​ມາສ້າງຕັ້ງເປັນ​ບໍລິສັດ​ມະຫາຊົນ.

ຂະ​ບວນການ​ດັ່ງກ່າວ ​ໄດ້ພົວພັນ​ກັບ​ຫລາຍ​ກະຊວງ ຫລາຍ​ຂະ​ແຫນງ​ການ ຂອງ​ ລັດ ລວມທັງ​ສະພາ​ແຫ່ງ​ຊາດ​, ສຳນັກງານ​ນາ​ຍົກ​ລັດຖະມົນຕີ ເພື່ອ​ຂໍ​ອະນຸມັດ​ຄືນ​ໃຫມ່ ຫລື ​ຍົກ​ເວັ້ນບາງຂໍ້​ກຳ​ນົດ ​ແລະ ມາດຕາ ຂອງ​ດຳລັດ ​ແລະ ກົດຫມາຍ​ຕ່າງໆ ທັ້ງນີ້ ກໍ​ຍ້ອນ​ວ່າ ​ບັນ​ຫານີ້​ເປັນ​ເລື້ອງ​ໃຫມ່ ສຳລັບ ສປປ ລາວ ​ແລະ ກໍ​ໄດ້​ດຳ​ເນີ​ນ​ໄປ​ຢ່າງ​ເຄັ່ງຮ້ອນ ເພື່ອ​​ໃຫ້​ທັນຕາ​ມກຳນົດ​ເວລາ ທີ່​ລັດຖະບານ​ໄດ້​ວາງ​ອອກ ຄື: ວັນ​ທີ 11/01/2011 , ​ເປັນ​ມື້​ເປີດ​ການ​ຊື້-ຂາຍ​ຮຸ້ນ​ ຄັ້ງທຳ​ອິດ ຂອງ ຕະຫລາດຫລັກຊັບລາວ .
ມາ​ເຖິງ​ວັນ​ທີ 13/12/2010 , ສະພາ​ແຫ່ງ​ຊາດ ກໍ​ໄດ້ ອອກ​ມະຕິ​ຕົກລົງ ຂອງ ຄະນະ​ປະຈຳ ສະພາ​ແຫ່ງ​ຊາດ ສະບັບເລກທີ 132/ຄປຈ ກ່ຽວ​ກັບ ການ​ຮັບຮອງ ​ແລະ ການ​ຍົກ​ເວັ້ນການ​ປະຕິບັດ​ກົດຫມາຍ​ ບາງ​ສະບັບ​ທີ່​ຕິດ​ພັນ​ກັບ​ວຽກ​ງານ​ຫລັກ​ຊັບ ​ແລະ ຕະຫລາດ​ຫລັກ​ຊັບ, ​ຄຽງຄູ່ກັນນັ້ນ ນາຍົກລັດຖະມົນຕີີ ກໍ​ໄດ້​ອອກ ດຳລັດ 526/ນຍ ວ່າ​ດ້ວຍ​ການ​ຍົກ​ເວັ້ນການ​ປະຕິບັດ ສະ​ເພາະ​ທີ່​ຕິດ​ພັນ​ກັບ​ການ​ອອກ ​ແລະ ສະ​ເຫ​ນີຂາຍ​ຮຸ້ນ​ຕໍ່​ມວນ​ຊົນຄັ້ງທຳ​ອິດ ​ແລະ ການ​ຈົດ​ທະບຽນ​ໃນ​ຕະຫລາດ​ຫລັກ​ຊັບ​ລາວ ຂອງ ບໍລິສັດ ຜະລິດ -ໄຟຟ້າ​ລາວ​ມະຫາຊົນ ແລະ ຂໍ້​ຕົກລົງສະບັບ ເລກທີ 180/ນຍ ວ່າ​ດ້ວຍ​ການ​ຮັບຮອງ​ແລະ​ ຢັ້ງຢືນ​ບັນຫາ​ສະ​ເພາະທີ່​ຕິດ​ພັນ​ກັບ​ການ​ສ້າງຕັ້ງ ບໍລິສັດ ຜະລິດ​-ໄຟຟ້າ​ລາວ​ມະຫາຊົນ  ອັນເປັນພື້ນຖານທາງດ້ານນິຕິກຳໃຫ້ ແກ່ ການສ້າງຕັ້ງ ບໍລິສັດ ຜະລິດ-ໄຟຟ້າລາວ ມະຫາຊົນ.

ຕົກມາ​ເຖິງ​ວັນທີ 15/12/2010 ກະຊວງ​ອຸດສາຫະກຳ ​ແລະ ການ​ຄ້າ ກໍ​ໄດ້ ອອກທະບຽນວິ​ສາ​ຫະກິດ ​ສະບັບເລກທີ 4637/ຫຈທ, ລົງວັນທີ 15/12/2010 ໃຫ້​ແກ່ ​ບໍລິສັດ​ ຜະລິດ-ໄຟຟ້າ​ລາວ​ມະຫາຊົນ ດ້ວຍທຶນຈົດ​ທະບຽນ​ ຈຳນວນ 2,605,792,200,000 ກີບ ​ແລະ ​ໄດ້ມີ​ການ​ສະ ເຫນີເພີ້ມທຶນ​ດ້ວຍການ​ຂາຍ​ຮຸ້ນ​ສາມັນ​ໃໝ່​ໃຫ້ແກ່​ພະນັກງານ ຂອງ​ ບໍລິສັດ ​, ພະນັກງານ ຂອງ ຟຟລ ​ແລະ ມວນ​ຊົນທົ່ວໄປ​​ ຊຶ່ງໄດ້ຮັບການອະນຸຍາດໃຫ້ອອກ ແລະ ຂາຍຮຸ້ນຕໍ່ມວນຊົນຕາມ ໃບອະນຸຍາດ ສະບັບເລກທີ 002/ສຄລຕ, ລົງວັນທີ 15/12/2010 ໃນຈຳນວນຮຸ້ນ 217,149,000 ຮຸ້ນ .

ໂດຍ​ປະຕິບັດ​ຕາມ​ນິຕິ​ກຳ​ ຕ່າງໆ ທີ່​ກ່າວ​ມາ​ຂ້າງ​ເທິງ​ນັ້ນ ລັດ​ວິ​ສາ​ຫະກິດ​ໄຟຟ້າ​ລາວກໍໄດ້​ໂອນ​ຊັບ​ສິນ​ພາກ​ຜະລິດ ຄື : ​ເຂື່ອນ​ໄຟຟ້ານ້ຳ​ງື່ມ 1 , ​ ນ້ຳ​ມັງ 3 , ​ ນ້ຳເລິກ , ​​​ເຊ​ເສັດ 1 , ​ແຊ​ເສັດ 2, ​​​ເຊ​ລະບຳ ​ແລະ ​ເຂື່ອນ​ໄຟຟ້າ​ນ້ຳ​ຊອງ (ຊື່​ງກຳລັງ​ກໍ່ສ້າງ ​ແລະຄາດ​ວ່າ​ຈະ​ສຳ​ເລັດ​​ໃນ ປີ 2​011 ນີ້)  ຊື່​ງລວມກຳລັງ​ຕິດຕັ້ງທັງ​ຫມົດ​ 387 MW, ສາມາດ​ຜະລິດ​ໄຟຟ້າ​ໄດ້ ສະ​ເລ່ຍ ປີ ໜຶ່ງປະມານ 1,923.5 ລ້ານ​ກິ​ໂລ​ວັດ​ໂມງ ​ໃຫ້​ແກ່​ບໍລິ​ສັດ ຜະລິດ​-ໄຟຟ້າ​ລາວ​ມະຫາຊົນ.
ໃນ​ມື້ວັນທີ 15/12/2010 ນີ້ ເອງ ບໍລິສັດ ​ຜະລິດ-​ໄຟຟ້າລາວ​ມະຫາຊົນ ກໍໄດ້ກຳ​ເນີ​ດ​ເກີດ​ຂຶ້ນ ເປັນ​ບໍລິສັດ​ມະຫາຊົນ​ທຳ​ອິດ ຂອງ ສປປ ລາວ ແລະ ສາມາດ​ເຄື່​ອນ​ໄຫວ​ທຸລະ​ກິດ ຢ່າງ​ຖື​ກ ຕ້ອງຕາ​ມກົດຫມາຍ ຂອງ ສປປ ລາວ.

ໃນວັນທີ 07 ມັງກອນ 2011 ປະຈຸບັນບໍລິສັດໄດ້ຈົດທະບຽນດ້ວຍທຶນທັງໝົດ 3.474.388.200.000 ກີບ ແລະ ມີຈໍານວນຮຸ້ນທັງ​ໝົດ 868.597.050 ຮຸ້ນ. ໃນ​ວັນ​ທີ 11 ມັງກອນ 2011, ຜ-ຟຟລ ຈຶ່ງ​ໄດ້​ຈົດ​ທະບຽນ​ເຂົ້າ​ໃນ​ ຕະຫລາດ​ຫລັກ​ຊັບ​ລາວ ເພື່ອ​ຈຳໜ່າຍ​ຮຸ້ນ​ໃນ​ຕະຫລາດ​ຂັ້ນ II ​ໃຫ້​ນັກ​ລົງທຶນຢ່າງ​ເປັນ​ທາງ​ການ. ຊັດສ່ວນ​ການ​ຖື​ຮຸ້ນ​ໃນ ຜ-ຟຟລ ຈຶ່ງ​ມີ ຟຟລ 75% ​​ແລະ ອີກ 25% ​ແມ່ນຂອງ​ນັກ​ລົງທຶນພາຍໃນ ແລະ ຕ່າງປະເທດ.

ໃນ​ກາງ ປີ 2012, ຜ-ຟຟລ ​ໄດ້ອອກຮຸ້ນສາມັນ ແບບສະເໜີຂາຍໃຫ້ຜູ້ຖືຮຸ້ນ ແລະ ແບບສະເໜີຂາຍຕໍ່ມວນຊົນທົ່ວໄປ ເພື່ອລະດົມທຶນໄປ​​ຊື້​ເອົາ​ຮຸ້ນ​ໃນ 4 ​ເຂື່ອນຜູ້​ຜະລິດ​ໄຟຟ້າ​ເອກະລາດທີ່​ ຟຟລ ຖືຮຸ້ນ​ຢູ່ ຊຶ່ງ​ປະກອບ​ມີ: ​ເຂື່ອນ​ໄຟຟ້າ​ເທີນ​ຫີນ​ບູນ (60%), ​ເຂື່ອນ​ໄຟຟ້າ​ນ້ຳ​ງື່ມ 2 (25%), ​ເຂື່ອນ​ໄຟຟ້າ​ຫ້ວຍ​ເຫາະ (20%) ​ແລະ ​ເຂື່ອນ​ໄຟຟ້າ​ນ້ຳ​ລີກ 1-2 (10%) ​ຊຶ່ງມີກຳລັງຕິດຕັ້ງທັງໝົດ 494 MW (ຕາມຊັດສ່ວນການຖືຮຸ້ນ) ເຮັດໃຫ້ກຳລັງຕິດຕັ້ງທັງໝົດຂອງ ຜ-ຟຟລ ມີຕົວເລກຢູ່ 881 MW. ດັ່ງນັ້ນໃນທ້າຍປີ 2012 ຜ-ຟຟລ ​​ມີ​ທຶນ​ຈົດ​ທະບຽນ​ເປັນ​ເງິນ 4.904.867.060.000 ກີບ ​ແລະມີ​ຮຸ້ນ​ທັງ​ໝົດ 1.226.216.765 ຮຸ້ນ ຊັດສ່ວນ​ການ​ຖື​ຮຸ້ນ​ຍັງ​ຮັກສາເໝືອນ​​ເດີມ.

ໃນເດືອນ ຕຸລາ 2014, ຜ-ຟຟລ ໄດ້ກາຍເປັນ ບໍລິສັດມະຫາຊົນທຳອິດ ໃນ ສປປ ລາວ ທີ່ໄດ້ຮັບການຈັດລຳດັບຄວາມໜ້າເຊື່ອຖື ໂດຍ ບໍລິສັດ TRIS Rating ຈຳກັດ ໃນລະດັບ BBB+, ເຊິ່ງຈັດຢູ່ໃນກຸ່ມ Investment Grade ຫຼື ໃນກຸ່ມລະດັບຄວາມສ່ຽງທີ່ເໝາະສົມ ແລະ ລົງທຶນໄດ້.

ໃນວັນທີ 12 ທັນ​ວາ 2014, ຜ-ຟຟລ ໄດ້ອອກຈຳໜ່າຍຮຸ້ນກູ້ ແລະ ສາມາດລະດົມທຶນໄດ້ 6.500 ລ້ານບາດ. ທຶນຈໍານວນດັ່ງກ່າວນີ້ ແມ່ນຈະຖືກນໍຳໃຊ້ ເພື່ອຂະຫຍາຍກໍຳລັງການຜະລິດເພີ່ມຕື່ມ ຈໍານວນ 392 MW, ໃນນັ້ນມີ ໂຄງການຜະລິດໄຟຟ້າຈາກ ຟຟລ ຈໍານວນ 4 ໂຄງການ ລວມກຳລັງຕິດຕັ້ງ 292 MW ແລະ ຊື້ຮຸ້ນທີ່ ຟຟລ ຖືໃນໂຄງການ IPP ອີກ 5 ໂຄງການ ລວມກໍາລັງຕິດຕັ້ງຕາມສັດສ່ວນຖືຮຸ້ນ 100 MW.

ມາຮອດ ວັນ​ທີ 10 ກຸມ​ພາ 2015, ຜ-ຟຟລ ໄດ້ຮັບໂອນຮຸ້ນ ຂອງ ​ເຂື່ອນ​ໄຟຟ້າ​ນ້ຳງື່ມ 5 (15%) ຕາມ​ຊັດ​ສ່ວນ ຟຟລ ຖື​ຮຸ້ນ ​ເທົ່າ​ກັບ 18 MW ເຮັດໃຫ້ມີກຳລັງຕິດຕັ້ງເພີ້ມ​ຂື້ນ​ເປັນ 899 MW.

ເພື່ອສືບຕໍ່ໃຫ້ບໍລິສັດເຕີບໃຫຍ່ຂະຫຍາຍຕົວຢ່າງຕໍ່ເນື່ອງ ໃນ ເດືອນ ກັນຍາ 2015 ຜ-ຟຟລ ໄດ້​ອອກ​ຮຸ້ນ​ເພີ່ມ​ທຶນ​ຄັ້ງ​ທີ 3, ເຮັດໃຫ້ລະດົມທຶນໄດ້ 2.754 ຕື້ກີບ. ເງິນທຶນທີ່ລະດົມໄດ້ໃນຄັ້ງນີ້ຈະຖືກນຳໃຊ້ເຂົ້າໃນການຂະຫຍາຍກຳລັງຕິດຕັ້ງ ຂອງບໍລິສັດ ເພີ່ມຕື່ມຈຳນວນ 386,2 MW, ໃນນັ້ນມີ ໂຄງການຜະລິດໄຟຟ້າທີ່ຈະຮັບໂອນຈາກ ຟຟລ ຈໍານວນ 5 ໂຄງການ ລວມ 277,9 MW, ການລົງທຶນໃນຮຸ້ນ ຂອງ ຟຟລ ໃນບັນດາໂຄງການ IPP ຈຳນວນ 6 ໂຄງການ ລວມກໍາລັງຕິດຕັ້ງຕາມສັດສ່ວນຖືຮຸ້ນ 108,3 MW. ເຮັດ​ໃຫ້ທຶນຈົດທະບຽນເປັນເງິນ 6.717.214.788.000 ກີບ ແລະ ມີຮຸ້ນທັງໝົດ 1.679.303.697 ຮຸ້ນ ຊັດ​ສ່ວນ​ການ​ຖື​ຮຸ້ນ​ຍັງ​ຮັກ​ສາ​ເໝືອນ​ເດີມ.

  • ​ ວັນ​ທີ 24 ທັນ​ວາ ປີ 2015, ຜ-ຟຟລ ໄດ້ຮັບໂອນ ເຂື່ອນ​ໄຟຟ້າ​ນໍ້າ​ຄານ 2 ກຳລັງ​ຕິດ​ຕັ້ງ 130 MW, ​ເຂື່ອນ​ໄຟຟ້າ​ຫ້ວຍ​ລໍາ​ພັນ​ໃຫຍ່ກຳລັງ​ຕິດ​ຕັ້ງ ​88 MW ແລະ ​ເຂື່ອນ​ໄຟຟ້າ​ນໍ້າ​ສະນາ ກຳລັງ​ຕິດ​ຕັ້ງ 14 MW ເຮັດໃຫ້ມີກຳລັງຕິດຕັ້ງທັງໝົດເພີ່ມ​ຂື້ນ​ເປັນ 1.131 MW.